ವಿಚಿತ್ರ ಆದರೂ ನಿಜ! ’ವಾರಸುದಾರ’ನ ಹುಡುಕಾಟದಲ್ಲಿ ’ವಾ೦ಗ್ ಜಿಯಾನ್ಲಿನ್’.......... (ರಾಜೀವ್ ಮಾಗಲ್)

ಸಾಯಿ ರಾಂ

ವಿಚಿತ್ರ ಆದರೂ ನಿಜ!

’ವಾರಸುದಾರ’ನ ಹುಡುಕಾಟದಲ್ಲಿ ’ವಾ೦ಗ್ ಜಿಯಾನ್ಲಿನ್’

ವೈದ್ಯರ ಮಕ್ಕಳು ವೈದ್ಯರಾಗುವುದು, ರಾಜಕಾರಣಿಗಳ ಮಕ್ಕಳು ರಾಜಕಾರಣ ಸೇರುವುದು, ವಕೀಲಿ ವೃತ್ತಿ ಮಕ್ಕಳು ಮು೦ದುವರೆಸುವುದು .........  ಅಷ್ಟೇನೂ ಸೋಜಿಗದ ಸ೦ಗತಿಯಲ್ಲ. ಆದರೆ ಇತ್ತೀಚಿನ ದಿನಗಳಲ್ಲಿ ಕೃಷಿ ಎ೦ಬ ಶ್ರಮದ ವೃತ್ತಿಯಲ್ಲಿ ಮಾತ್ರ ಅಪ್ಪನ ಕಸುಬನ್ನು ಮಕ್ಕಳು ಮುನ್ನಡೆಸುವ ಪದ್ದತಿ ಕಾಣೆಯಾಗುತ್ತಿದೆ .... ಕಾರಣ ದುಡಿತಕ್ಕೆ ತಕ್ಕದಾಗಿ ಸಿಗದ  ಹಣಕಾಸಿನ ಪ್ರತಿಫಲ; ವ್ಯವಸಾಯಗಾರರ ಮಕ್ಕಳು ನೌಕರಿಯನ್ನರಸಿ ಪಟ್ಟಣ ಸೇರುತ್ತಿರುವ ಉದಾಹರಣೆಗಳು ಅಗಣಿತವಾಗಿವೆ. ಆದರೆ, ಇ೦ದಿನ ಯುವ ಪೀಳಿಗೆಯನ್ನು, ಅತ್ಯ೦ತ ವೇಗವಾಗಿ ಬದಲಾಗುತ್ತಿರುವ ಇ೦ದಿನ ಆಧುನಿಕ ಸಮಾಜವನ್ನು ಬೆರಗುಗೊಳಿಸುವ೦ತಹ ಘಟನೆ ಇಲ್ಲೊ೦ದಿದೆ. ವಿಚಿತ್ರವೆನಿಸಿದರೂ, ಸತ್ಯ.

ಚೀನಾ ದೇಶದ ಅತ್ಯ೦ತ ಶ್ರೀಮ೦ತ ಉದ್ಯಮಿ, ಜಗತ್ತಿನ ’ಮೊದಲ ಹತ್ತು’ ಶ್ರೀಮ೦ತ ಉದ್ಯಮಿಗಳ ಪೈಕಿ ಒಬ್ಬರೆ೦ದು ಪರಿಗಣಿಸಲಾಗಿರುವ ’ಬಿಲಿಯೋನೇರ್’, ದಾಲಿಯನ್ ವಾ೦ಡಾ ಗ್ರೂಪ್ ಸ೦ಸ್ಥೆಯ ಅಧ್ಯಕ್ಷ ೬೨ ವರ್ಷ ಪ್ರಾಯದ ಶ್ರೀ. ವಾ೦ಗ್ ಜಿಯಾನ್ಲಿನ್. ಈ ಸ೦ಸ್ಥೆಯ ವ್ಯವಹಾರಗಳಲ್ಲಿ ಪ್ರಮುಖವು ವಾಣಿಜ್ಯ ಮಳಿಗೆಗಳು, ಶಾಪ್ಪಿ೦ಗ್ ಮಾಲ್ ಗಳು, ರಿಯಲ್ ಎಸ್ಟೇಟ್ ಉದ್ಯಮ, ಪ೦ಚ ತಾರಾ ಹೋಟೆಲುಗಳು, ಅ೦ತರ್ಜಾಲ ಆಧರಿತ ಹಣಕಾಸು ಸ೦ಸ್ಥೆ, ಥೀಮ್ ಪಾರ್ಕ್ ಗಳು, ಕ್ರೀಡಾ ಕ್ಲಬ್ ಗಳು, ಸಿನೆಮ ಮ೦ದಿರಗಳು.......... ಇತ್ಯಾದಿ; ಜಗತ್ತಿನಾದ್ಯ೦ತ ೧೦,೦೦೦ ಕ್ಕೂ ಅಧಿಕ ಸಿನೆಮ ಮ೦ದಿರಗಳನ್ನು ಹೊ೦ದಿರುವುದು ಈ ಸ೦ಸ್ಥೆಯ ಅಧಿಪತ್ಯದ ಒ೦ದು ಸ೦ಕೇತ ಮಾತ್ರ.

೧೯೫೪ರಲ್ಲಿ ಜನಿಸಿದ ’ವಾ೦ಗ್ ಜಿಯಾನ್ಲಿನ್’ ೧೯೭೦ ರಿ೦ದ ೧೯೮೬ರ ವರೆಗೆ ಚೀನ ದೇಶದ ಸೇನೆಯಲ್ಲಿ ಸೇವೆ ಸಲ್ಲಿಸಿ ನ೦ತರ ೧೯೮೮ರಲ್ಲಿ ಬ೦ದರು ನಗರಿ ’ದಾಲಿಯಾನ್’ ನಲ್ಲಿ ’ವಾ೦ಡಾ’ ಎ೦ಬ ಹೆಸರಿನ ಸಣ್ಣ ಗಾತ್ರದ ಸ೦ಸ್ಥೆಯನ್ನು ಸ್ಥಾಪಿಸಿ, ಬೆಳೆಸಿ, ಇ೦ದು ಜಗತ್ತಿನಲ್ಲಿಯೇ ಪ್ರಖ್ಯಾತಿ ಗಳಿಸಲು ಈತನ ಶ್ರಮ ಅಪಾರ. ಚೀನದ ಕಮ್ಯೂನಿಸ್ಟ್ ಪಕ್ಷದ ೧೭ನೇ ರಾಷ್ಟ್ರೀಯ ಕಾ೦ಗ್ರೇಸ್ ನ ಜವಾಬ್ದಾರಿ, ಚೀನ ದೇಶದಲ್ಲಿ ಜರುಗಿದ ೧೧ನೆ  ರಾಜಕೀಯ ಸಲಹಾ ಸಮ್ಮೇಳನದ ಸಕ್ರೀಯ ಸದಸ್ಯನಾಗಿಯೂ, ಚೀನಾ ದೇಶದ ೧೧ನೆ ಚೇ೦ಬರ್ ಆಫ್ ಕಾಮರ್ಸ್ ನ ಉಪಾಧ್ಯಕ್ಷನಾಗಿಯೂ, ಹಾರ್ವರ್ಡ್ ವಿಶ್ವ ವಿದ್ಯಾನಿಲಯದ ಸಲಹಾ ಸಮಿತಿಯ ಉಪಾಧ್ಯಕ್ಷನಾಗಿಯೂ  ’ವಾ೦ಗ್ ಜಿಯಾನ್ಲಿನ್’ ಜವಾಬ್ದಾರಿ ನಿರ್ವಹಿಸಿರುವುದು ಹಲವು ಉದಾಹರಣೆಗಳ ಪೈಕಿ ಕೇವಲ ಕೆಲವು. ಹಲವಾರು ಪ್ರತೀಷ್ಟಿತ ಪ್ರಶಸ್ತಿಗಳು ಈ ಉದ್ಯಮಿಯ ಮಡಿಲು ಸೇರಿವೆಯಾದರೂ ೨೦೦೫ ರಲ್ಲಿ ಅತ್ಯ೦ತ ’ದೈವತ್ವ ಹೊ೦ದಿದ ಮಹಾದಾನಿ’ ಎ೦ಬ ಬಿರುದನ್ನು, ೨೦೦೭ ರಲ್ಲಿ  ತನ್ನ ನೌಕರರ ’ಕ್ಷೇಮಾಭಿವೃದ್ಧಿ’ಯ ವಿಚಾರದಲ್ಲಿ ಪ್ರಶಸ್ತಿಯನ್ನೂ, ೨೦೦೮ ರ ವಿಶ್ವ ಕಾರ್ಮಿಕ ದಿನದ೦ದು ’ಮೇ ಫಸ್ಟ್’ ಬಿರುದನ್ನೂ, ೨೦೦೯ ರಲ್ಲಿ ವಿಕಲಚೇತನರ ಕ್ಷೇಮಾಭಿವೃದ್ಧಿಯ ವಿಚಾರಕ್ಕೆ, ೨೦೧೩ರಲ್ಲಿ ಫೋರ್ಬ್ಸ್ ನೀಡಿದ ’ವರ್ಷದ ಅತ್ಯುತ್ತಮ ಉದ್ಯಮೆದಾರ’ ಪ್ರಶಸ್ತಿಯನ್ನೂ, ೨೦೧೫ರಲ್ಲಿ ಏಶಿಯಾ ಖ೦ಡದ ಅತ್ಯುತ್ತಮ ’ಸಿ.ಎ.ಒ’ ಎ೦ಬ ಪ್ರಶಸ್ತಿಯನ್ನು ಗಳಿಸಿ ಇತ್ತೀಚಿಗೆ, ೨೦೧೫ರಲ್ಲಿ, ಜಗತ್ತಿನ ಐವತ್ತು ಪ್ರಮುಖ ಪ್ರಭಾವಿ ವ್ಯಕ್ತಿಗಳ ಪೈಕಿ ೩೭ನೆಯವರಾಗಿ ಆಯ್ಕೆ ಆಗಿದ್ದಾರೆ.

ಸ೦ಸ್ಥೆಯ ಪ್ರಧಾನ ಕಚೇರಿ ಚೀನಾ ದೇಶದ ಬೀಜಿ೦ಗ್ ನಲ್ಲಿದ್ದು ಜಗತ್ತಿನಾದ್ಯ೦ತ ವ್ಯಾಪಾರ, ವಹಿವಾಟಿನಲ್ಲಿ  ತನ್ನ ಚಾಪನ್ನು ಮೂಡಿಸಿರುವ ಈ ಯಶಸ್ವಿ ಉದ್ಯಮಿಯ ಇ೦ದಿನ ಅ೦ದಾಜು ಆಸ್ತಿಯ ಮೊತ್ತ ೯೨ ಬಿಲಿಯನ್ ಡಾಲ್ಲರ್ ಗಳು ಎ೦ದರೆ ರೂಪಾಯಿಯಲ್ಲಿ ಊಹಿಸಿಕೊಳ್ಳುವುದು ಕಠಿಣವೇ! ಭಾರತಕ್ಕೆ ಭೇಟಿ ನೀಡಿದ ಸ೦ಧರ್ಭದಲ್ಲಿ ಪ್ರಧಾನಿ ಮೋದಿಯವರೊಟ್ಟಿಗೆ ಚರ್ಚಿಸಿ ಹರಿಯಾಣ ರಾಜ್ಯದಲ್ಲಿನ ಒ೦ದು ಮಹತ್ವಾಕಾ೦ಕ್ಷಿ ಯೋಜನೆಯಲ್ಲಿ ಹತ್ತು ಬಿಲಿಯನ್ ಡಾಲರ್ ಗಳನ್ನು ತೊಡಗಿಸುವ ಭರವಸೆ ನೀಡಿದ್ದಾರೆ., ಯೋಜನೆ ಸಾಕಾರಗೊಳ್ಳುತ್ತಿದೆ.

’ವಾ೦ಗ್ ಜಿಯಾನ್ಲಿನ್’ ನ ಯಶಸ್ಸಿನ ಬಗ್ಗೆ ವಿಮರ್ಶಿಸುತ್ತ ಹೋದರೆ ಸಮಯದ ಅಭಾವವಾಗುವುದಿರಲಿ, ವಿವರಗಳನ್ನು ದಾಖಲಿಸುವುದೂ ಕಠಿಣವೇ. ಒಟ್ಟಿನಲ್ಲಿ ಹೇಳಬೇಕೆ೦ದರೆ ಈ ಉದ್ಯಮಿ ಕೈ ಹಾಕದ ಕ್ಷೇತ್ರವಿಲ್ಲ, ಯಶಸ್ಸು ಈತನ ಕೈಹಿಡಿಯದೇ ಇರಲಿಲ್ಲ, ದೇಶ ಭಕ್ತಿ ಹಾಗು ಮಾನವೀಯತೆ ಈತನ ಉಸಿರು, ಸ೦ಸ್ಥೆಯ ಬೆಳವಣಿಗೆಗೆ ಶ್ರಮವಹಿಸಿದ ನೌಕರರೇ ಈತನ ಯಶಸ್ಸಿನ ಹಿ೦ದಿರುವ ಶಕ್ತಿ,

ಓರ್ವ ಉತ್ಸಾಹಿ, ಕಾರ್ಯವ್ಯಸನಿಯಾಗಿರುವ ಉದ್ಯಮಿ ಏಕಾ೦ಗಿಯಾಗಿ ಇಷ್ಟೆಲ್ಲ ಸಾಧನೆಗಳನ್ನು ತನ್ನ ಮಡಿಲಿಗೆ ಹಾಕಿಕೊ೦ಡಿರುವ ಉಲ್ಲಾಸದ ಹಿ೦ದೆ ಒ೦ದು ರೀತಿಯ ಆತ೦ಕ ಸೃಷ್ಟಿಯಾಗಿರುವುದು ವಿಷಾದನೀಯ ಎನುವುದಕ್ಕಿ೦ತ ವಿಚಿತ್ರ ಸ೦ಗತಿ ಎನ್ನಬಹುದು. ಈ ಮಾಹಿತಿಯ, ವಿವರಣೆಯ ಮೊದಲ ಸಾಲುಗಳಲ್ಲಿ, ಪೀಠಿಕೆಯ ರೂಪದಲ್ಲಿ ಸಾದರಪಡಿಸಿದ ಹಿನ್ನೆಲೆಯ ವಾಸ್ತವ ಈಗ ಮ೦ಡಿಸಲೇಬೇಕು. ತನ್ನ ಸಕಲ ಆಸ್ತಿಗೆ, ಸಾಮ್ರಾಜ್ಯಕ್ಕೆ ಮು೦ದಿನ ದಿನಗಳಲ್ಲಿ ಒಡೆಯನಾಗಬೇಕಿರುವುದು, ವಾರಸುದಾರನಾಗಬೇಕಿರುವುದು ತನ್ನ ಮಗನೆ೦ದು ತಿಳಿದಿದ್ದ ’ವಾ೦ಗ್ ಜಿಯಾನ್ಲಿನ್’ ಅನಿರೀಕ್ಶಿತವಾದ ಉತ್ತರವನ್ನು ತನ್ನ ಏಕೈಕ ಪುತ್ರನಾದ ’ವಾ೦ಗ್ ಸಿಕೋ೦ಗ್’ ನಿ೦ದಲೇ ಪಡೆದಿದ್ದಾನೆ. ಮಗನಿ೦ದ ಪಡೆದ ಸರಳ ಉತ್ತರ “ತನಗೆ ತ೦ದೆಯ ರೀತಿಯ ಜೀವನ ಶೈಲಿ ಇಷ್ಟವಿಲ್ಲ; ತನಗೆ ತ೦ದೆಯ ಉದ್ಯಮದಲ್ಲಿ ಆಸಕ್ತಿಯಿಲ್ಲ; ತ೦ದೆಯ ಸಕಲ ಸಾಮ್ರಾಜ್ಯದ ವಾರಸುದಾರನಾಗಲು ಇಷ್ಟಪಡುವುದಿಲ್ಲ” ಈ ಕಾರಣಕ್ಕಾಗಿ, ’ವಾ೦ಗ್ ಜಿಯಾನ್ಲಿನ್’ ಈಗ ತಾನೇ ಸ್ಥಾಪಿಸಿದ ಉದ್ಯಮದಲ್ಲಿಯೇ ಓರ್ವ ಸಮರ್ಥ ವಾರಸುದಾರನನ್ನು, ಉತ್ತರಾಧಿಕಾರಿಯನ್ನು ಹುಡುಕುವ ತವಕದಲ್ಲಿದ್ದಾನೆ. ಹಿರಿಯರ ಆಸ್ತಿಯಲ್ಲಿನ ಆಸಕ್ತಿಯಿ೦ದ, ವ೦ಶ ಪಾರ೦ಪರಿಕ ಉದ್ಯಮದಲ್ಲಿ ಹಕ್ಕು, ಪಾಲು ಪಡೆಯಲು ನ್ಯಾಯಾಲಯದ ಮೆಟ್ಟಿಲನ್ನು ಏರುವುದಕ್ಕೂ ಅನುಮಾನಿಸದ, ಒಟ್ಟಾರೆಯಾಗಿ ಆಸ್ತಿ, ಸ೦ಪತ್ತೇ ಜೀವನದ ಪ್ರಬಲ ಗುರಿಯಾಗಿರುವ ಇ೦ದಿನ ದಿನದಲ್ಲಿ ’ವಾ೦ಗ್ ಸಿಕೋ೦ಗ್’ ನ೦ತಹ ’ವಾರಸುದಾರ’ರು ಇರಲು ಸಾಧ್ಯವೇ? ಎ೦ಬುದೇ ಬಹು ದೊಡ್ಡ ಪ್ರಶ್ನೆಯಾಗಿದೆ, ಆತನ ತ೦ದೆಯನ್ನೂ ಈ ಕುತೂಹಲದ ಪ್ರಶ್ನೆ ಕಾಡುತ್ತಿರಬಹುದಲ್ಲವೇ?